開倉

近排真係好唔得閒 (同懶)，無心記寫 blog。

上篇提過嘅 Le Creuset Private Sale (俗稱開倉)，Quo-Quo 尾二嗰日先得閒去 (實情係 E 先生嗰日先得閒幫忙湊女，Quo-Quo 先有得去。) 朝早送完明珠小姐返學就搭車出去銅鑼灣，大約 9:20 到。遠遠已經見到條隊開始行，應該係放第一批人入酒店裡面嘅 waiting area。Quo-Quo 晌外面排到差不多 11:00 就入到個 waiting area，再多一個鐘就入到會場。其實都唔算辛苦，晌外面大部份時間都有得坐又唔洗曬 (仲有些少風添)，只係企咗大概 4-5 個字。

最辛苦係入到會場之後，要晌人群裡面搵嘢，仲要所有嘢都亂糟糟。好多人霸住好多貨，晌地下揀，揀完又唔放返去，一地都係。仲有好多人唔識開啲煲盒，扯到爛晒。Quo-Quo 一個人，要避開所有人同貨嚟搵煲，難度極高。最終都搵唔到想要嘅 Cassis 色大煲。諗住睇吓 Dune 色，但多數都有好多白點，上色唔靚。睇睇吓 Dune 色，忽然有個 Granite 色晌個 Dune 盒裡面，仲要無乜瑕疵添!  哈，你整定係我㗎嗱!

Granite 31cm Oval French Oven (HK$1800)

可以放個 22cm Round 入去，不過要反蓋先襟得埋蓋囉。

Lavender 12oz. Mug (HK$100) &

Set of 4 Champagne Glasses (HK$230)

早兩個星期 E 先生無啦啦話我哋無香檳杯 (其實咁多年都無㗎嗱，唔知點解而家先講喎。)，咁 Quo-Quo 就叫佢自己去買啦。當然佢梗係又懶懶閒啦!  開始開倉之後，Quo-Quo 見到有 groupmates 買香檳杯，仲咁平，就同 E 先生彙報。所以哩 set 香檳杯係 E 先生話買嘅。Quo-Quo 只係買咗兩樣嘢咋，好節制呀!