大孖醬園

有睇開肥媽嗰套「食平啲」都知道有盆鹽哩樣嘢，個節目仲有去大孖間舖拍外景添。Quo-Quo 都想買啲盆鹽嚟試下，而大孖嘅豉油就想買咗好耐㗎嗱，只係一直無去開觀塘嗰頭。上星期過開去九龍東，可以順路兜埋去買嘞。

嗰朝早食早餐時上咗去 LC 個毒 group 巡咗轉，groupmates 都話打過電話去大孖問，已經無晒盆鹽賣。無得賣都照去啦，橫掂 Quo-Quo 都去開嗰頭，又唔係淨係買盆鹽。

去到大孖，見裡面有幾隻生抽，就問有乜分別。老闆就話，隻「特級生抽」係 cheap 嘢，而隻「古法頭抽」就靚啲。仲有其他生抽嘅，不過成 HK$138 一支，都係試咗哩兩隻平啲嘅先啦。除咗豉油，老闆亦極力推薦隻「豆豉蒜蓉醬」，真係好香!

咁 Quo-Quo 就要咗一支特級生抽 (用嚟醃肉)、一支古法頭抽 (點餸嚟食或做豉油雞、蒸魚)、一支老抽、一罃豆豉蒜蓉醬同一罃辣腐乳。要咗哩幾樣嘢之後就問老闆盆鹽係唔係賣晒，老闆好好人，讓咗一盒畀我!


(原來晌大孖買盆鹽要用晌 Hermés 買 Birkin 嘅策略。首先要買幾樣嘢，之後先問有無盆鹽賣。哈哈~~~)

其實平時啲盆鹽唔難買㗎，仲可以打定電話訂貨添。今次只係佢已經差唔多賣晒哩造嘅盆鹽，今年雨水又多曬唔成，所淨無幾先收埋嚟賣咋。