南小館

晌 Hysan 12 樓嘅南小館算係新派上海菜。

我哋等位時已經寫好單點餸，因為今次晏咗到，所以要等。

(Quo-Quo 家平時盡量早食飯避開繁忙時間，唔洗等同趕還檯，招待又好啲。)

一坐低就奉上香氣濃郁、陣陣麥香嘅蕎麥茶。Like!

南小館四小拼 (HK$68)

花雕白雞 -- 酒味香濃，雞都算滑。

口水川雞 -- 有啲麻辣味，但唔夠入味。

四喜烤麩 -- 過得去。

糖醋排骨 -- 甜酸適中，排骨唔肥有啲韌。

小籠包 (HK$38)

皮做得夠薄，肉汁豐富。

酸辣湯 (HK$38)

夠酸唔夠辣，但好足料。

蔥油開洋拌麵 (HK$30)

非常香，應該係落咗豬油。(雖然好味，但好彩唔係自己一個人食，

如果唔係唔肥死都膽固醇過高死呀。)

八寶醬菜飯 (HK$48)

普普通通，油膩咗啲。

蒜蓉芥蘭 (HK$28)

全部都係芥蘭芯，好嫩。

南小館甜甜拼 (HK$58)

茉莉花茶凍 -- 好香茉莉花茶味，但魚膠粉未溶晒 (仲有粒粒晌底)，

似 custard 多過 pudding。

杏仁白玉凍 -- 好滑，又有杏仁味，好食!

椰香紅棗糕 -- 味道無問題，但韌咗啲。

上海綠豆糕 -- 唔知係雪得太耐定點，唔夠酥軟。

整體食物、服務同價錢都 okay，不過下次都係早啲食好啲。