Mongolian Pork 蒙古醬炒肉片

住晌外國嘅 blogmates 都知道，外國有啲中國餐館嘅餸菜，連中國人都未聽過嘅。

例如: Chicken Chop Suey -- 雞肉雜碎，究竟乜嘢嚟㗎?  其實只係雞肉炒雜菜，做乜唔就咁叫 Chicken with Mixed Vegetables 喎。另外 Szechuen sauce，又似回鍋肉，又似川椒雞，但係外國人食嘢辣極有限，邊道似四川菜?!?!  仲有 Fortune Cookies，根本都無哩樣嘢嘅!

今次 Quo-Quo 煮哩個蒙古醬仲衰，直頭唔知同蒙古有乜關係。不過除咗個 '唔啦更' 嘅名之外，哩個醬幾好食㗎。因為有 Quo-Quo 鍾意嘅海鮮醬同蒜蓉辣椒醬丫嘛。

數量	材料	製法
250g 2 茶匙 1/2 茶匙 1/4 茶匙 少許	豬肉片 水、生抽 油、酒 生粉、糖 胡椒粉	撈勻調味料，醃肉 15 分鐘。
1 個 各 1 個	洋蔥 青、紅、黃椒	洋蔥 & 青、紅、黃椒切件。
適量 1 湯匙 2 茶匙 1/2 茶匙	雞湯或水 海鮮醬 蒜蓉辣椒醬 鹽、生粉	鑊中落油將洋蔥炒軟，加入豬肉片。豬肉炒至半熟，加入青、紅、黃椒和汁料煮滾。醬汁杰身，豬肉熟透便成。