大中華飯店

上個星期我哋約咗 E 先生啲同事去大中華食飯， 聽講哩間店啲嘢好得。Quo-Quo 嗰朝早仲去埋 gym 諗住打定個底先，拆餐勁嘅。

哩間店係幾間鋪位嚟嘅，所以分開幾個區，裡面係大排檔格局。基本上，哩到除咗收單、上菜同埋單，無人會理你。係呀!  係收單呀，因為要自己寫菜落單㗎!  我哋哩班用開電腦嘅人，要用筆寫，仲要寫中文，真係考起呀!  我哋最早到，E 先生就叫 Quo-Quo 寫定幾個餸，等其他人嚟到就有些少嘢食住先，我哋又可以食住等。Quo-Quo 晌香港只係讀到 4 年班就去咗澳洲，中文識睇多過識寫，所以要抄餐牌嘅餸名先識落單。其他人嚟到就梗係畀佢哋寫啦，點知讀得最多中文嗰個 (中五) 話有幾個字唔識寫。我就叫佢好似我咁抄餐牌，哈哈!  你話我哋幾咁唔掂呀!

椒鹽白飯魚

炸得好酥，做前菜一流。

黑椒豬手

鐵板未到已經聞到好香，上檯時黑椒汁不斷滋滋聲同冒煙。

豬手煮得好淋，黑椒汁亦都好惹味。

炭燒奶豬

賣相唔錯，個皮燒得好脆，點乳豬醬同芥末醬都幾好味。

但因為係奶豬，無乜肉得層肥膏，太肥膩。$480 其實都幾貴。

(Quo-Quo 都係鍾意金兜記嘅乳豬，師傅會片走啲肥膏，

無咁肥膩。佢嗰啲係乳豬唔係奶豬，有多啲肉食。)

仲有其他餸，但食到唔記得影相。

冰鎮墨魚片 -- 厚肉，但無味。

白灼花甲 -- 鮮甜、無沙。

臘味煲仔飯 -- 熱辣辣、大大個瓦煲上檯，有飯焦，好食。

上湯浸勝瓜 & 上湯菜心苗 -- 唔係就咁用清湯，裡面有炸蒜、冬菇片、甘筍、肉碎和竹笙。

XO 醬生菜包 -- 豆多過肉，XO 醬應該已經好夠味，再加辣椒變咗太辣。生菜唔知有無洗，有幾隻有翼嘅 '朋友仔' 晌裡面。

總括嚟講唔錯，直得一試。