Marmite Chicken Chow Mein (Liverpool - Day 8 Dinner)

明珠小姐話想食麵，唯有盡量去達到佢o既要求啦!  (哩個女好少開口要求食乜，因為佢唔多鍾意食o野。)  雖然住 serviced apartment 有廚房用，但晌資源短缺o既情況下煮係一個問題。

Quo-Quo 同 E 先生諗o左一段時間，再晌超市行來行去，睇o下有乜材料。終於決定煮外國人好鍾意o既 Chicken Chow Mein!  哈哈!!

跟住 E 先生就話:「都話o左資源短缺，apartment 只提供鹽同胡椒，我o地之前買o左支油、糖、鹽同 mixed herbs。用乜o黎醃雞呀?  哩幾樣唔夠味啵。無理由為o左煮一餐麵買成支豉油o架?!?! 」

Quo-Quo 自言自語:「唔夠味… 要濃味醃雞… 落 d Marmite 囉!  夠味喇o卦!」

E 先生:「o下?!?!  你又o黎?  今次得唔得o架?」  (話說 Quo-Quo 試過用 Gooseberry Jam 煮雞脾)

Quo-Quo:「上次都幾好食呀。」

E 先生:「係!  但今次係 Marmite 啵。」

Quo-Quo:「Marmite 鹹又濃味，咪o岩啦。」

結果，明珠小姐食完一碗再添多半碗，而 E 先生就包底清晒 d 炒麵!  任務完成!

數量	材料	製法
300g 2 湯匙 1.5 湯匙 1 湯匙 1/2 茶匙 少許	雞脾肉 暖水 Marmite 油 糖 胡椒碎 / 粉	雞脾肉洗淨、切塊。 Marmite 用暖水開稀，撈勻所有醃料，醃雞肉 30 分鐘。
2 條 100g 1 個 1 茶匙	甘筍 四季豆 洋蔥 油	全部切條。甘筍、四季豆放入滾水內焯熟。鑊中落油將洋蔥炒至金黃，兜起備用。
300g 1 茶匙 50ml 少許	油麵 油 水 鹽	同一鑊內，落油炒雞脾肉至熟透，兜起備用。剩下醃料 / 雞汁加水、鹽煮滾，落油麵燴 3 分鐘。將所有材料回鑊兜勻便成。